సాధారణ పనుల ద్వారానే అసాధారణ ప్రతిభ
****** ****** ******
గ్రీస్ దేశంలోని ఒక నగరంలో ఒక అనాథ బాలుడుండేవాడు. రోజూ అడవికెళ్ళి కట్టెలు కొట్టి, వాటిని నగరంలో అమ్మేవాడు. అదే ఆ బాలుడి బ్రతుకుతెరువు.
నగరంలోని ఒక వీధిలో ఆబాలుడు కట్టెల మోపు దించుకొని కూర్చున్నాడు. ఆ దారిన వెళుతున్న తత్త్వవేత్త "డెమోక్రటస్" ఆ బాలుణ్ణి చూశాడు. అతడి ముందున్న కట్టెల మోపును గమనించాడు. "బాబూ! ఈ మోపు నువ్వే కట్టావా?" అని అడిగాడు. "అవునయ్యా" అన్నాడు ఆ బాలుడు." అయితే, ఈ మోపును విప్పి మళ్ళీ కట్టగలవా?" అని అడిగాడు డెమోక్రటస్.
ఈ ప్రశ్న విని బాలుడు ఆశ్చర్యపడ్డాడు. వెంటనే కట్టెల మోపు విప్పాడు. కట్టె పుల్లలన్నీ చెల్లాచెదురుగా పడ్డాయి. మళ్ళీ వాటిని క్రమంగా జోడించి, మునుపటిలా కట్టాడు. పనిలో ఆబాలుడు చూపుతున్న శ్రద్ధను గమనించిన డెమోక్రటస్ "బాబూ! నువ్వు నాతోరా, బాగా చదువుకో. అందుకు కావలసిన వసతులు కల్పిస్తాను" అన్నాడు. బాలుడు డెమోక్రటస్ ను అనుసరించాడు. ఆ బాలుడు చదువుపట్ల డెమోక్రటస్ ఎంతో ఆసక్తి చూపాడు. తర్వాత ఆ బాలుడు పెరిగి పెద్దయ్యాక గణిత శాస్త్రవేత్తగా ప్రసిద్ధుడయ్యాడు.
ఆయనే విశ్వవిఖ్యాత గణిత శాస్త్రవేత్త "పైథాగరస్".
సేకరణ: రామ్మోహన్.
No comments:
Post a Comment