*_🪔నీకు నువ్వే దీపం కావాలి🪔_*

=================

*ఇద్దరు ప్రయాణికులు ఒక దారిలో కలిశారు.* 

*ఒకతని దగ్గర లాంతరు ఉంది.*

*ఇంకొకతని దగ్గరలేదు.* 

*కానీ ఇద్దరూ కలిసి పక్కపక్కనే నడవడం వల్ల కాంతి ఇద్దరి మార్గాల్లో పరుచుకోవడం వల్ల మార్గం సుగమంగా ఉంది.*

*దీపం ఉన్న వ్యక్తి ఎంత సులభంగా అడుగులు వేస్తున్నాడో లాంతరు లేని వ్యక్తి కూడా అంతే అనాయాసంగా సాగుతున్నాడు.* 

*కారణం దీపమున్న వ్యక్తితో బాటు దీపం లేని వ్యక్తి నడవడమే.*

*లాంతరు లేని వ్యక్తి తన దగ్గర లాంతరు లేదే అని దిగులు పడలేదు.* 

*కారణం దాని అవసరం అక్కడ లేదు.*

*అట్లా ఇద్దరూ చాలా దూరం నడిచాకా ఒక నాలుగురోడ్ల కూడలికి చేరారు.* 

*అప్పటి దాకా ప్రయాణం సాఫీగా సాగింది.* 

*అక్కడినించీ దార్లు వేరయ్యాయి. లాంతరు ఉన్న వ్యక్తి కుడివేపుకి, లాంతరు లేని వ్యక్తి ఎడమవేపుకి వెళ్ళాలి.*

*లాంతరు ఉన్న వ్యక్తి కుడివేపు తిరిగి వెళ్ళిపోయాడు.* 

*కాంతి అతనితో బాటు అతనికి దారి చూపిస్తూ వెళ్ళింది.*

*లాంతరు లేని వ్యక్తి ఎడమవేపుకి తిరిగి పది అడుగులు వేశాడో లేదో కాలు ముందుకు కదల్లేదు. కారణం చీకటి.* 

*అతనికి ఏడుపు వచ్చింది. లాంతరు ఉన్న వ్యక్తిని తలచుకున్నాడు. అతని దగ్గరగా తను నడుస్తున్నంత సేపూ ప్రయాణం అనాయాసంగా జరిగింది. అతను వెళ్ళిపోయాకా తన మార్గం అంధకారబంధురమయింది.*

*తన దగ్గర కూడా కనీసం చిన్న దీపమయినా ఉంటే ప్రయాణం సాఫీగా సాగేది కదా అని బాధ పడ్డాడు.*

*మనకు ఇతరులు కొంతవరకే మార్గం చూపిస్తారు.* 

*తరువాత మనదారి మనం వెతుక్కోవాలి.* 

*చివరిదాకా ఎవరూ ఎవరికీ దారి చూపరు.* 

*గురువు చేసే పనయినా అదే.*

*గురువు దగ్గరున్న కాంతి కొంతవరకే దారి చూపుతుంది.*

*శిష్యుడు తనలోని దీపాన్ని వెలిగించుకున్నపుడు ప్రయాణం చివరిదాకా చేయగలడు.*

*_“నీకు నువ్వే దీపం కావాలి”_ అని బుద్ధుడు అనడం వెనక అర్థమదే...!* 

_(FB post by --Suguna Rupanagudi)_

------------------- 

*_{సేకరణ: --వెలిశెట్టి నారాయణరావు, విశ్రాంత సాంఘీకశాస్త్ర ఉపాధ్యాయుడు🙏}_*