వివాహమహోత్సవంలో మూడు ముళ్ల బంధానికి ఎంతో ప్రాముఖ్యత ఉంది.. .

వివాహమహోత్సవంలో మూడు ముళ్ల బంధానికి ఎంతో ప్రాముఖ్యత ఉంది. అసలు మూడు ముళ్లు ఎందుకు వేస్తారు. ఏడడుగులకు ఉన్న ప్రాధాన్యత ఏంటి అనే సందేహం చాలా మందికి కలుగుతుంది. మరి వివాహనికి ఉన్న ప్రాముఖ్యత ఏంటో ఇప్పుడు చూద్దాం.🙏

వివాహం.. అంటే రెండు మనుషులే కాదు ఇరు కుటుంబాల కలయిక. ముఖ్యంగా హిందు సంప్రదాయంలో పెళ్లికి ఎంతో ప్రాముఖ్యత ఉంది. వివాహం అనేది జన్మల జన్మల బంధం అని అంటారు. అందుకే పెళ్లిళ్లు స్వర్గంలో నిర్ణయిస్తారు(మ్యారేజెస్ ఆర్ మేడిన్ హెవెన్) అని అంటారు. ఇందులో ప్రాముఖ్యత గురించి ఈ తరం వారికి అంతగా తెలియకపోవచ్చు. అయితే తెలుసు ఈ మహత్కార్యం గురించి తెలుసుకోవాల్సిన ఆవశ్యకత ఎంతైనా ఉంది. వివాహంలో ముఖ్యంగా చెప్పుకోవాల్సిన ఘట్టాలు మూడు ముళ్లు, ఏడు అడుగులు గురించి తెలుసుకోవాలి. చాలామందికి వరుడు.. వధువు మెడలో మూడు ముళ్లు ఎందుకు వేస్తాడు. ఏడడుగులకు ఉన్న ప్రాధాన్యత ఏంటి అనే విషయాలు తెలుసుకోవాలి.
​మూడు ముళ్లకున్న ప్రాధాన్యత..

మంగళ సూత్రం అనే శబ్దం సంస్కృతం నుండి వచ్చింది. సంస్కృతంలో 'మంగళ' అంటే శోభాయమానం, శుభప్రదం అనే అర్ధాలు ఉన్నాయి. సూత్రం అంటే తాడు. అంటే ఆధారమైనది అని అర్థం. సాధారణంగా మంగళసూత్రాన్ని 108 సన్నని పోగులు, దారాలు కలిపి తయారు చేస్తారు. ఆ పోగులకు పసుపు రాసి రూపొందిస్తారు. ఈ తాళిని వరుడు.. వధువు మెడలో మూడు మూళ్లు వేస్తాడు. మంగళ సూత్రధారణ జరుగే సమయంలో వేదపండితులు ఓ మంత్రాన్ని పఠిస్తారు. మాంగల్యం తంతనానేనా మమజీవన హేతునా! కంఠే భద్నామి సుభగే త్వం జీవ శరదాం శతం!! అనే మంత్రాన్ని పండితులు పఠిస్తూ మహత్కార్యాన్ని పూర్తిచేస్తారు.

​మూడు ముళ్లే ఎందుకు వేస్తారంటే..🙏

హిందూ సంప్రదాయం ప్రకారం మూడు అనే సంఖ్యకు విశిష్టమైన ప్రాధాన్యత ఉంది. త్రిలోకాలు, త్రిమూర్తులు, త్రిగుణాలు ఇలా మూడు అనేవి మంగళకరమని భావిస్తారు. అందుకే మంగళ సూత్రానికి మూడు ముళ్ల వేస్తారు. మానవులకు స్థూల, సూక్ష్మ , కారణ అనే మూడు శరీరాలు ఉంటాయి. పెళ్లి సమయంలో ఒక్క ముడి ఒక్కో శరీరానికి వేసేది. అంటే భాహ్యశరీరంతోనే కాదు మొత్తం మూడు శరీరాలతో మమేకం అవుతాను అనే అర్థంలో ఈ మూడు ముళ్లు వేస్తారు.

మంగళ సూత్రము భార్యా భర్తల శాశ్వత బంధానికి గుర్తు. అది వైవాహిక జీవితాన్ని సమస్త కీడులనుండి తొలగిస్తుందని హిందువుల నమ్మకం. శక్తి స్వరూపిణి అయిన స్త్రీ మెడలో మంగళ సూత్రం ఉన్నంత వరకూ భర్తకు ఆయుషు ఉంటుందని నమ్ముతారు. అందుకే హిందూ స్తీ మంగళ సూత్రం ధరిస్తుంది. వివాహిత మెడలో మంగళ సూత్రం లేదంటే భర్త చనిపోయినట్లుగా భావిస్తారు.

​ఏడడుగులు ఎందుకు వేస్తారంటే..🙏

మూడు ముళ్ల తర్వాత హోమం చుట్టూ ఏడడుగులు ప్రదక్షిణ చేస్తారు వధువరులు. అంటే జీవిత భాగస్వామితో ఏడు జన్మల వరకూ తోడుంటా అని వాగ్ధానం చేస్తూ ఏడడుగులు వేస్తారు. ఇంకా వివరంగా చెప్పాలంటే ఒక్కో అడుగుతో ఒక్కో భరోసాను జీవిత భాగస్వామికి ఇస్తున్నట్లు లెక్క.

మొదటి అడుగు.. అన్నవృద్ధికి. అంటే అన్నపూర్ణగా పిలిచే మనదేశంలో పంటలు బాగా పండాలని ఆకాంక్షిస్తూ వేసేది.

రెండో అడుగు.. బల వృద్ధికి.. వధువరుల ఇరు కుటుంబ సభ్యుల ఆయురారోగ్యాలతో ఉండాలని వేస్తారు.

మూడో అడుగు.. ధన ప్రాప్తి కలగాలని వేస్తారు.

నాలుగో అడుగు.. దంపతులిద్దరూ సదా సుఖ సంతోషాలతో ఉండాలని వేస్తారు.

ఐదో అడుగు.. ఒక్క తమ కుటుంబం మాత్రమే కాకుండా సమాజానికి తమ చేతనైన మేరకు సాయం చేస్తామని చెబుతూ ఐదో అడుగు వేస్తారు.

ఆరో అడుగు.. వైవాహిక జీవితంలో ఎలాంటి కలహాలు, అనుమానాలు లేకుండా సాఫీగా సాగాలని వేస్తారు.

ఏడో అడుగు.. శారీరకంగా, మేధో పరంగా పుష్ఠి కలిగిన సంతానాన్ని కలిగించాలని వేసే అడుగు.🙏

సేకరణ