@ బతికున్నట్టేనా....@
రవ్వంత గాలి పీల్చి
ఓ గ్లాసుడు నీళ్లు తాగి
మూడు పటలా తింటున్నావు కదా
నువ్వు బ్రతికున్నట్టేనా?
*******
ఎప్పుడైనా
పక్షుల్ని పలకరించావా
లేలేత చిగురుల సంభాషణ విన్నావా
పసిపిల్లల
ముఖాల్లోని కాంతి
నీ హృదయం లోకి ప్రయాణించిందా
అసలు ....
నువ్వు బ్రతికున్నట్టేనా
****
రైతు ...
భూమిపై చేస్తున్న
సౌందర్యాత్మక చేవ్రాలు గమనించావా
సముద్రాల నుంచి
వానని మోసుకొస్తున్న
మేఘాల రాగం ఆలకించావా
మొక్క ...
పుష్పిస్తున్నప్పటి
పురిటి నొప్పుల చిత్రం
నువ్వు గీయగలవా
చెప్పూ...
నువ్వు బతికున్నట్టేనా
*******
ఎప్పుడైనా ఎవరికైనా
హృదయం అందించావా
బాధతో బరువెక్కిన
మిత్రుని భుజంపై చేయి వేసి
బ్రతుకును తేలిక చేసావా
పక్కింట్లో
మొన్న మరణించిన మనిషిని
స్మశానం వరకు సాగనంపావా
అయ్యో .....
నువ్వు బతికున్నట్టేనా
- సుంకర గోపాలయ్య
('మా నాయిన పాట' నుండి)M
No comments:
Post a Comment