2035 . ముచ్చర్ల న్యూరో సిటీ , హైదరాబాద్ !
రాగిణి !
47 ఏళ్ళ వయసు .
క్వాంటం కంప్యూటింగ్ కంపెనీ లో పని చేస్తోంది .
నెలకు ఇరవై లక్షల జీతం .
స్మార్ట్ హోమ్ .
నాలుగు బెడ్ రూమ్స్ విల్లా.
ఐఐటీ ముంబై లో చదివినప్పుడు లివ్ ఇన్ రిలేషన్షిప్ లో ఉండేది .
సంవత్సరానికి బ్రేక్ అప్ అయ్యింది .
పురుషాధిక్యతను భరించలేక పోయింది .
ఇక జీవితం లో ... లివ్ ఇన్... పెళ్లి లాంటి ... జంజాటాలు వద్దనుకొంది.
నాన్న నాలుగేళ్ళ క్రితం... అమ్మ... మూడేళ్ళ క్రితం పోయారు .
అప్పట్లో .. పెళ్లి చేసుకోమని వారు చెబుతుంటే... చిరాకు పడేది.
వారి మాటల విలువ ఇప్పుడు అర్థమవుతోంది .
"మిడ్ లైఫ్ మేట్స్" అనే వివాహ సంస్థకు అప్లై చేసింది .
తనకంటే వయసులో మూడేళ్లు చిన్నవాడు రాకేష్ .
మొదటి భార్యతో విడాకులు తీసుకొన్నాడు .
ఇద్దరూ పెళ్లి చేసుకొన్నారు .
తమకు పొసగదని ఆరునెలల్లోనే ఇద్దరూ గ్రహించి విడాకులు తీసుకొన్నారు .
రాగిణిది... తిరిగీ... ఒంటరి జీవితం .
" ఏ వయసులో జరగాల్సిన ముచ్చట ఆ వయసులో జరగాలి . ఇరవైలోనే ముడిపడితే పొందికగా కలిసుంటారు .వయసు పెరిగే కొద్దీ బంధాలు నిలవడం కష్టం.
ఒంటరి జీవితం నరకం "...
ఇరవై అయిదేళ్ల ఏళ్ళ క్రితం అమ్మమ్మ చెప్పిన మాటలు .
అప్పట్లో... చాదస్తం అని తాను తీసిపడేసిన మాటలు ..
ఇప్పుడు పదేపదే గుర్తొస్తున్నాయి .
తన కంపెనీ లో రోబో బైట్ అనే పెద్ద కాంటీన్ ఉంది .
రోబో చెఫ్ . రోబో సెర్వింగ్ అసిస్టెంట్స్ .
బ్రేక్ ఫాస్ట్ మొదలు రాత్రి డిన్నర్ దాక .. అన్నీ అక్కడే ఫ్రీ గా దొరుకుతాయి .
ఒక్కో పూట ఇరవై ముప్పై ఫుడ్ ఐటమ్స్ బఫెట్ .
వారం లో ప్రతి రోజు కొత్త మెనూ .
అయినా తిన బుద్ధి పుట్టదు .
ఆ ఫుడ్ తిని తిని .. బోర్ కొట్టేసింది . కాంటీన్ వాసన సోకితేనే వాతొస్తుంది.
ఫుడ్ డెలివరీ అప్స్ లో ఆర్డర్ ఇస్తే... అది ఇంకా చెత్తగా ఉంటోంది .
ఫాటీ లివర్ వచ్చింది .
" రిఫైన్డ్ కార్బ్స్, ట్రాన్స్ఫాట్స్ ఎక్కువ తింటున్నారు . షుగర్ ఫ్రీ అడిటివ్స్ ... ఆర్టిఫిషల్ కలర్స్ కూడా ఎక్కువగా తింటున్నట్టున్నారు . కాన్సర్ కు అతి దగ్గరలో వున్నారు" అని రోబో డాక్టర్... హెల్త్ చెక్ అప్ లో భాగంగా హెచ్చరించాడు .
తన కంపెనీ కాంటీన్ లో ఆర్గానిక్ ఫుడ్ ఆప్షన్ కూడా ఉంది .
అయినా ఏదీ... తిన బుద్ధి కాదు .
ఆ రోజుల్లో అమ్మ చేతి వంట ఎంత బాగుండేదో .
నాన్నమ్మ వంట నేర్చుకోమని చెబితే తాను పడీపడీ నవ్వేది .
బామ్మ మాట బంగారు మాట... అని తనకు ఇప్పుడు అనిపిస్తోంది .
రాగిణి .. వర్క్ ముగించుకొని రాత్రి పన్నెండుకు పడుకొంది.
నిద్ర పట్టడం లేదు .
ఈ మధ్య కాలం లో గట్టిగా మూడు గంటలు నిద్రపోలేక పోతోంది .
అప్పటికీ ... ఇన్సొమ్నియా మందులు తింటోంది .
తెల్లవారు జామున మూడు గంటలు .
బెడ్ పై అటు ... ఇటు దొర్లుతోంది .
అమ్మ... నాన్న... అమ్మమ్మ... నాన్నమ్మ ... చెప్పిన మాటలు పదేపదే గుర్తొస్తున్నాయి .
నెలకు ఇరవై లక్షల జీతం .
తిండి సహించదు .
నిద్ర పట్టదు .
ఒళ్ళు రోగాల పుట్ట .
మెడికల్ ఇన్సూరెన్సు ఉన్నా... సంపాదనలో సగం ఆసుపత్రులకు పోతోంది .
ఒంటరి జీవితం.
తనదీ ఒక బతుకేనా ?
ఎందుకు బతుకుతున్నట్టు ?
ఎవరి కోసం బతుకుతున్నట్టు ?
ఇంత చదువు చదివి తాను సాధించింది ఏంటి ?
కంపెనీ కూలి .
కాదు కాదు ..
కూలి... పనయ్యాక ఇంటికెళ్లి పోతాడు .
తానేమో కంపెనీ కి బానిస .
కంపెనీ కోసం . కంపెనీ ద్వారా కంపెనీ చేత ..
ఇదీ తన బతుకు.
ఏడ్చి ఏడ్చి దిండు తడిచిపోయింది .
తెల్లవారుతోంది . కళ్ళ కింద డార్క్ సర్కిల్స్ .. ఏడ్చి ఏడ్చి మొఖం ఉబ్బి పోయింది .
కనీసం ఓదార్చేవాళ్ళు లేరు .
ఇదీ నా బతుకు అనుకొంటూ .. లేచి కూర్చొని ఫోన్ తీసుకొంది.
రామ్ ఆన్లైన్ లో ఉన్నాడు.
ఆఫీస్ కొలీగ్ .
తనదీ ఒంటరి జీవితం . ఇద్దరి మధ్య అర గంట చాటింగ్ .
చివర్లో కొన్ని లింక్స్ పంపాడు .
రాగిణి వాటి గురించి.. చాట్ బాట్ ద్వారా మరింత సమాచారం పొందింది .
1 . తాయారమ్మ బంగారయ్య !
ఇదో ఎమోషనల్ వెల్నెస్ కంపానియన్ కంపెనీ .
అచ్చ తెలుగులో చెప్పాలంటే.. అద్దెకు ఆమ్మ నాన్న .
గంట సర్వీస్ కు పదివేలు .
బుక్ చేసుకొంటే అరవై - డెబ్భై లో ఉన్న ..ఒక జంట .. అంటే తన ఆమ్మ నాన్న బతికుంటే ఎంత వయసులో ఉండేవారో అదే వయసు వారు ఇంటికి వస్తారు .
వారిని "అమ్మా" " నాన్న" అని పిలవొచ్చు .
మనసు విప్పి మాట్లాడొచ్చు .
తన బాధల్ని వారు శ్రద్ధగా వింటారు .
ఓదార్చుతారు .
ఆమ్మ ఒడిలో పడుకొని ఏడవొచ్చు . కన్నీళ్లు తుడుస్తుంది. నాన్న తల నిమురుతాడు . భుజం తడుతాడు.
ఇదీ క్లుప్తంగా తాయారమ్మ బంగారయ్య సర్వీస్ వివరాలు .
ఇది ఈ మధ్య బాగా పౌపులర్ అవుతోందని రేట్ కాస్త ఎక్కువగా ఉన్నా మంచి ఫలితం ఉంటుందని రామ్ చెప్పాడు .
రెండో సర్వీస్ ..
2 . బొమ్మరిల్లు !
ఇదో లోన్లినెస్ కేఫ్ .
తెలుగులో చెప్పాలి అంటే పూట కూళ్ళ భోజనం .
ముందుగా బుక్ చేసుకోవాలి .
ఆదివారలైతే సంవత్సరం దాక స్లాట్లు బుక్ అయిపోయాయి .
వారం దినాల్లో అయితే ఇప్పుడు ప్రీమియం రేట్స్ .
ఒక ఇంటికి... ఒక రోజుకు ... ఒకరు లేదా ఇద్దరు మాత్రమే .
పొద్దునే ఇచ్చిన చోటు... అంటే పెద్ద వారి ఇంటికి వెళ్ళాలి .
అక్కడ బామ్మ లాంటి వ్యక్తి తలంటి స్నానం చేయిస్తుంది .
తలకు సాంబ్రాణి వేస్తుంది .
అటు పై నష్టా.. కట్టె పొంగలి.. సాంబారు... గట్టి చట్నీ .
టిఫిన్ అయ్యాక కాసేపు కబుర్లు . వైకుంఠ పాళీ .. దాయాలు..
మధ్యాహ్నం ... రాత్రి అరిటాకు భోజనాలు .
ఆమ్మ లాంటి వ్యక్తి కొసరి కొసరి కొసరి వడ్డిస్తుంది .
అచ్చం ఆమ్మ చేతి వంట .
అమృతం .
రాత్రి ఆరుబయట వెన్నెల్లో డిన్నర్ .డిన్నర్ అయ్యాక కబుర్లు . లాలి పాటలు .
ఒక రోజు సర్వీస్ కు కేవలం లక్ష .
ఆదివారాలు ఇంకా తత్కాల్ బుకింగ్ అయితే రెండు లక్షలు మాత్రమే .
౩, బడి పంతులు !
ఇదో పర్సనలైజ్డ్ కౌన్సిలింగ్ కంపెనీ .
తెలుగులో చెప్పాలంటే మీ ఇంట్లో మాస్టారు !
జనాలు పాసైకియాట్రిస్టు ల తో విసిగిపోయారు .
ప్రతి చిన్న దానికి గంపెడు మందులు రాసి... కొండ నాలుకకు మందేస్తే అసలు నాలుక ఊడినట్టు చేస్తున్నారు .
అందుకే ఈ కంపెనీ కి బాగా డిమాండ్ పెరిగింది .
ఒక విధంగా ఇది కూడా తాయారమ్మ బంగారయ్య కంపెనీ లాంటిదే .
అక్కడ పెద్దలు తన బాధల్ని వింటారు .ఓదార్చుతారు .
బడిపంతులో కంపెనీ ద్వారా వచ్చిన పెద్ద ... బాధల్ని వినడమే కాకుండా వాటికి చక్కటి పరిష్కార మార్గాలు చూపుతాడు .
తన సమస్యలకు బడిపంతులు కంపెనీ ద్వారా నే మంచి పరిష్కారం దొరుకుతుందని రాగిణి .. అప్ ద్వారా బుక్ చేసింది . నెల తరువాత స్లాట్ దొరికింది .
ఆ రోజు... ఒకాయన ఇంటికొచ్చాడు .
రాగిణి చెప్పింది శ్రద్ధగా విన్నాడు .
" కిందబోసి .. ఏరుకోవడం... అని దీన్నే అంటారు . నా లాంటి వాళ్ళు ఆరోజుల్లో వివాహం కుటుంబ వ్యవస్థల గురించి చెబితే పెద్దగా పట్టించుకొనే వారు కారు .
ఇప్పుడు అనుభవిస్తున్నారు .
రాగిణీ... నీ సమస్యలకు ఒకటే పరిష్కారం . నీకు నాలుగు బెడ్ రూమ్స్ విల్లా ఉంది కదా . ఇందులో నువ్వు ఒకతే.
ప్రకటన ఇవ్వు .
సెంట్రల్ జైలు లో ఏకాంత కారాగార శిక్ష అనుభవిస్తున్న వారిలా ... ఈ రోజు కోట్లమంది .
ఇంటర్వ్యూ చేసి ముగ్గురిని ఎంపిక చేసుకో .
వారు కూడా నీ వయసు... నీ మెంటాలిటీ ... ఉన్నవారు కావాలి .
చెరి ఒక్కరికి ఒక్కో బెడ్ రూమ్ .
హాల్ ... కిచెన్... అందరికీ కామన్ .
కలిసి వంట చెయ్యండి .
నీ కంపెనీ వాడు ఫుడ్ ఫ్రీ గా పెట్టి నిన్ను కట్టుబానిస చేసాడు .
ఫుడ్ ఫ్రీ గా వస్తుందని నువ్వు పొద్దునుంచి రాత్రి దాక అక్కడే ఉంటున్నావు .
ఇల్లు అనేది ఒకటుంది .
అది లేక పొతే మనిషి లేడు.
పెళ్లి చేసుకొని ఇల్లు చూసుకొని చల్లగా కాలం గడిపే రోజులు పోయాయి . బతకడం కోసం పని .. డబ్బు .
కానీ ఇప్పుడు నీలాంటి వారు పని కోసమే బతుకుతున్నారు .
నీ పే ప్యాకేజి నీ జీవితానికి ఉరితాడు అయ్యింది .
ఇంటికి వంటగది ముఖ్యం .
పూజ గది కన్నా అది పవిత్రం .
మరో ముఖ్యమయిన చోటు డైనింగ్ టేబుల్ .
వారం లో ఏడు రోజులు .
రోజుకు మూడు పూటలు . అంటే 21 .
కనీసం 19 సార్లు ఇంట్లోనే వంట చెయ్యాలి .
కలిసి తినాలి . అందరూ కూర్చొని మాట్లాడాలి .
మనసు విప్పి... బేషజాలు లేకుండా ఆత్మీయంగా మాట్లాడుకోవాలి .
షో ఆఫ్ లు వద్దు .
బడాయి మాటలు వద్దు .
లక్షాది కారి అయినా లవణ మన్నమే.
మనం తినే తిండే మన ఆరోగ్యం .
మనం మాట్లాడుకొనే మాటలే మన మానసిక ఆరోగ్యం .
ఈ కంపెనీ ని నా ఆలోచన మేరకు నా విద్యార్థులు స్టార్ట్ చేసారు .
నేను ఫ్రీ గా సర్వీస్ ఇస్తున్నాను .
ఇదిగో బుక్ చేసేటప్పుడు నువ్వు కట్టిన లక్ష ఫీజు .
నా సర్వీస్ నీకు ఫ్రీ .
పదేళ్ల క్రితం బాలమిత్ర అని క్లాసులు స్టార్ట్ చేశా . ప్రారంభం లో పెద్దగా పట్టించుకొనేవారు కారు .
ఇదిగో ఇప్పుడు కొండవీటి చేంతాడు అంత వెయిటింగ్ లిస్ట్ .
పదో రౌండ్ బాలమిత్ర క్లాసులు నడుస్తున్నాయి . పోయిన వారమే సూర్యాపేట , ఖమ్మం , వరంగల్ కరీంనగర్ క్లాసులు అయ్యాయి . నెక్స్ట్ వైజాగ్ వెళుతున్నా.. ఈ లోగా ఈ రోజు జిం కు వెళ్ళాలి " అంటూ బడిపంతులు మెరుపు వేగం తో వెళ్ళిపోయాడు .
రాగిణి ఆలోచనలో పడిపోయింది .
పది పదహైదు ఏళ్ళ క్రితం ఈ బడిపంతులు తనకు తారసపడి ఉంటే నా జీవితం ఏ రోజు అడవి కాచిన వెన్నెల అయివుండేది కాదు .. నా ఖర్మ" అనుకొంటోంది .
శుభోదయం .
No comments:
Post a Comment