*అహో గుణవతీ మమ భార్యా*

              

*ఒక గురుకులం లో ఒకతను చదువుకుంటూ వుండే వాడు.*

*ఆ గురువు భార్య పెద్ద గయ్యాళి. గురువును ఎప్పుడూ సతాయిస్త్తూ వుండేది.* 

*ఆమె నోటికి హద్దూ పద్దూ వుండేది కాదు.  శిష్యుడి కేమో ‘ఎందుకు ఆమెను గురువు గారు అదుపు  చెయ్యడం లేదు?’ అనిపించింది.* 

*నేరుగా వెళ్లి గురువు గారినే అడిగేశాడు. ఆయన నవ్వుతూ…  “అదంతే లే నీకూ పెళ్లి అయితే తెలుస్తుంది.” అన్నాడు.*

*అందుకు శిష్యుడు… “నేనయితే నా భార్యను చాలా అదుపులో పెట్టుకుంటాను.” అన్నాడు.*

*”సరేలే నీవు పెళ్లి చేసుకున్నాక నేను వచ్చి చూస్తాను. నీవెంత                       నీ భార్యను అదుపులో  పెట్టుకున్నావో” అన్నాడు.*

*శిష్యుని చదువు  పూర్తయింది, తన వూరికి వెళ్లి పెళ్లి చేసుకున్నాడు. వాడి భార్య గురువుగారి భార్య కంటే గయ్యాళి. ఏమయినా అంటే బయటికి  వెళ్లి గోల చేసి పరువు తీసేది.* 

*అందుకని శిష్యుడు ఆమెను భరిస్తూ వచ్చాడు. అప్పటికి తెలిసివచ్చింది భార్యను అదుపు చెయ్యడం యెంత కష్టమో.*

*కొన్ని సంవత్సరాలు గడిచాక గురువు శిష్యుడి యింటికి వస్తున్నట్టు కబురు పెట్టాడు.* 

*శిష్యుడికి భయం పట్టుకుంది. తనేమో పెద్దగా బీరాలు పలికాడు…  ‘నాభార్యను అదుపులో పెట్టుకుంటా’నని.*

*ఇప్పుడెలా?*

*భార్యను బ్రతిమ లాడాడు… ‘మా గురువుగారు వస్తున్నారు ఆయన ఒకే పూట వుంటారు. కాస్త నేనెన్ని తిట్టినా నోరుతెరువకుండా వుండు’ అని.*

*ఏ కళనుందో ఆమె ఒప్పుకుంది. ‘అయితే వంద తిట్లవరకూ ఊరుకుంటాను, తర్వాత                             నా వల్లకాదు’  అని షరతు పెట్టింది.*

*భార్య ఒప్పుకున్నందుకే సంబర పడిపోయి ‘సరేలే.’  అన్నాడు.*

*గురువుగారు వచ్చారు. యింక మనవాడు రెచ్చిపోయాడు. సమయం దొరికింది కదా అనిప్రతిదానికీ  ఆవిడని తిడుతూ కసురుతూ వున్నాడు.* 

*ఆవిడ చాలా గట్టిది.    వంద చింతగింజలు ఒక పళ్ళెం లో పెట్టుకొని ఒక్కో తిట్టుకూ ఒక్కో గింజ బయట పడేస్తూ వుంది.*

*గురువు గారూ, శిష్యుడు భోజనానికి కూర్చున్నారు. ఆమె వడ్డించినంత సేపూ ఏదో ఒకటి తిడుతూనే  వున్నాడు. గురువు గారి కేమో చాలా ఆశ్చర్య మేసింది. ‘వీడు నిజంగానే భార్యను చాలా అదుపులో పెట్టుకున్నాడు. ఆమె నోరే తెరవడం లేదు పాపం అనుకున్నాడు.*

*కాసేపటికి వంద తిట్లూ పూర్తయిపోయాయి.*

*శిష్యుడు… “ఏమే తెలివిలేనిదానా! గురువు గారికి కాస్త పులుసు మారు  వడ్డించాలని తెలియదా? వడ్డించు!” అని గద్దించాడు.* 

*ఆవిడ పులుసు కుండ తీసుకొని వచ్చి గురువు నెత్తిన పగులగొట్టింది.*

*గురువుగారు ఆ వేడివేడి పులుసు పడేసరికి మంటతో అల్లాడి పోయి పెరట్లోకి వెళ్లి నీళ్ళు  నెత్తిన పోసుకుంటున్నాడు.*

*అప్పుడు ఆవిడ వచ్చి… “నా కుండ నీ మూలంగా పగిలిపోయింది! కుండకు డబ్బులిచ్చి కదులు!!” అని బెదిరించింది.* 

*అప్పుడు గురువు గారు ఒక శ్లోకం చెప్పారు…*

               

*”అనేక శత భాండాని భిన్నాని మమ మస్తకే ।*

*అహో గుణవతీ మమ భార్యా భాండ మూల్యం న  యాచతే॥*

*అర్థము:--*

*ఎన్నో వందల కుండలు నా నెత్తిన పగిలాయి. కానీ ఆహా! నా భార్య ఎంత గుణవతి! ఎప్పుడూ కుండ డబ్బులు అడగలేదు!!*✍️

.          *సర్వం శ్రీకృష్ణార్పణమస్తు*