☘️🍁  ఆప్తవాక్యాలు  🍁☘️

98. ఇనో విశ్వస్య భువనస్య గోపాః

సూర్యుడు సమస్త విశ్వమునకు రక్షకుడు (ఋగ్వేదం)

'సౌరమతం' వర్ధిల్లింది.

వేదమంత్రాలు అసంఖ్యాకంగా సూర్యశక్తిని అభివ్యక్తీకరించాయి. దీని ఆధారంగానే తేజః స్వరూపుడైన పరమేశ్వరుడు సూర్యమండలం ద్వారానే జగతికి శక్తిప్రదాత అయ్యాడు. ప్రాణశక్తి, కాంతి మొదలైనవి విశ్వమంతా సూర్యుని

ద్వారా ప్రసరింపబడుతున్నాయి.

పగళ్లు, రాత్రులు, ఋతువులు, సంవత్సరాలు, యుగాలు - అన్నీ సూర్యుని వలననే ఏర్పడుతున్నాయి. కాలకర్తగా స్పష్టమౌతున్న సూర్యతేజస్సు 'సృష్టిస్థితిలయలకు

హేతువౌతున్నది. రక్షణ, శిక్షణ కూడా సూర్యకిరణాల నుండే లభిస్తున్నది.

'ఏకం సత్ విప్రా బహుధా వదన్తి...' అనే ప్రసిద్ధ మంత్రం సూర్యునికి

సంబంధించినదే. ఐశ్వర్యకారకమైన సూర్యశక్తికి 'ఇన్దుడ'నీ, స్నేహ(జిడ్డు) లక్షణం కల కిరణాలను 'మిత్ర' అనీ, ఆర్ద్రత కలిగించే కిరణశక్తి 'వరుణ' అనీ, పోషకశక్తి 'పూ' అనీ, తేజశ్శక్తి 'భగ' అనీ ఒకే భగవానుడు పలువిధాలుగా వ్యవహరింపబడుతున్నాడు.

-

తన శక్తిని అంతటా వ్యాపింపజేసే సర్వవ్యాపకత్వం చేత 'విష్ణువ'నీ, అపార ప్రభావం చేత 'రుద్రు’డనీ, మంగళత్వం చేత 'శివుడనీ, బుద్ధిని ప్రేరేపింపజేయడం చేత 'బృహస్పతి'

అనీ, కాంతిగణ నియామకుడు కనుక 'గణపతి' అనీ, తన వెలుగులతో తానే దిగి వస్తున్నందున 'స్కందు’డనీ... సర్వదేవతా స్వరూపాలనీ సూర్యునిలోనే దర్శించవచ్చు.

అందుకే అగ్ని ఉపాసనలోనూ సూర్యుని ప్రాధాన్యం కనిపిస్తుంది. ఒకే సూర్యశక్తి బహు విభూతుల్ని విస్తృతంగా దర్శించి ప్రత్యక్షం చేసిన విజ్ఞానం వేదమంత్రరాశిలో

గోచరిస్తుంది.

సూర్యకిరణాలనే దేవతలుగా, జగత్ప్రేరకులుగా వేదమంత్రాలు వర్ణిస్తున్నాయి. సూర్యునిలోని వర్ణశక్తులు బహుగ్రహశక్తి చోదకాలుగా భాసిస్తున్నాయి.

వివిధ దేవతామూర్తుల వర్ణాలు, ఆకృతులు, ఆయుధాలు సూర్యశక్తిలోని పలుతీరులకు ప్రతీకలు. “చిత్రం దేవానాముదగాదనీకం...” వంటి వైదిక మంత్రాలు దానికి ఉదాహరణలు.

జగచ్చక్షువుగా, కర్మసాక్షిగా సూర్యుని ప్రత్యక్షీకరించే పురాణవాఙ్మయం మనకు విస్తారంగా ఆదిత్యోపాసనని పేర్కొంది. అన్నప్రదాతగా, విజయప్రదాతగా రవి రోచిస్సును దర్శించారు మహర్షులు.

వృక్షాదులకు పత్రహరితమనే అన్నశక్తి సూర్యకిరణాల నుండే లభిస్తోంది. అది ఇతర ప్రాణులకు ఆహారమౌతోంది. భూమిపై పంచభూత వ్యవస్థకు నియామకుడు ఆదిత్యుడే. భాస్కర కిరణాలలో బహువిధ నైపుణ్యాలున్నాయి. నిర్మాణం, మేధస్సు, శుద్ధి మొదలైన అనంతశక్తులు ఆ కిరణరూపాలలో దాగి ఉన్నాయి. ఒకొక్క శక్తికి

ఒకొక్క దేవత ప్రతీక.

సూర్యుని చైతన్యశక్తినే లక్ష్మి అనీ, పరాశక్తి అనీ కీర్తిస్తున్నాం. ఈ సూర్యారాధన వలన ధర్మరాజు అన్ననిర్మాణ ప్రభావాన్ని సంపాదించాడు. అనేకమంది

ఆయురారోగ్యాలను పొందిన వైనాలను పురాణాలు అనేక విధాలుగా తార్కాణాలను

చూపించాయి. రాముడు చేసిన ఆదిత్యోపాసన రామాయణంలో ప్రసిద్ధి.మహాభారతంలో కూడా ఆదిత్యార్చన అద్భుతంగా పేర్కొనబడింది.

ఉషఃకాలం, సంధ్యాకాలం ఆదిత్య మండలాంతర్గత దివ్యతేజస్సును ధ్యానం ద్వారా అనుసంధాన పరచి, సూక్ష్మమైన ఓజస్తేజస్సును స్వీకరించే ప్రక్రియలు మన ఆధ్యాత్మికసాధన సంస్కృతిలో ఎన్నో కనిపిస్తాయి.

సూర్యచైతన్యశక్తినే అరుంధతిగా, సరస్వతిగా, గాయత్రిగా, గౌరిగా, లక్ష్మిగా పలురూపాలలో శాక్తేయ వాఙ్మయం వర్ణించింది.

 సూర్యమండలాంతర్వర్తి అయిన

హిరణ్మయ మూర్తిని వైష్ణవులు విష్ణునిగా, శైవులు శివునిగా, శాక్తేయులు శక్తిగాసంభావించారు.

'ఇనః' అనే శబ్దానికి 'ప్రభువు' అనేది ప్రధానార్థం.