*Bhagavad Gita: భగవద్గీత పఠనమే జన్మదుఃఖ విముక్తి మార్గం... కర్మ, భక్తి, జ్ఞాన యోగాల మార్గదర్శిని గీతా -15!*

*సాక్షాత్తు వ్యాస భగవానుని కృపా ప్రసాదంతో, గీతామాత ఆరాధనకు మనకు లభించిన ఈ పవిత్ర అవకాశాన్ని మీతో పంచుకోవడం ఆనందకరమైన కర్తవ్యంగా భావిస్తున్నాం...*

*సాక్షాత్తు భగవంతుని వ్యక్తస్వరూపము, మూర్తి స్వరూపమైన శ్రీమద్భగవద్గీత మానవాళికి అందిన రోజు గీతా జయంతి రోజు. డిసెంబర్ ఒకటవ తేదీకి గీతా జయంతి వస్తుంది. ఈ గీతా జయంతి సందర్భంగా, పూజ్య శ్రీ గురుదేవుల ఆశీస్సులతో శ్రీమద్భగవద్గీత అష్టోత్తర శతనామావళిలోని ఈరోజు 15వ రోజు నామాన్ని మీ ముందుకు తీసుకొస్తున్నాము.*

*ప్రతి నామం వెనుక ఉన్న అర్థం, ఆధ్యాత్మికత, భక్తి సారాన్ని తెలుసుకొని మనం గీతామాతను మరింతగా ఆరాధించుకుందాం. ఈ పవిత్ర ప్రయత్నంలో భాగంగా, యావత్ భారతదేశ ప్రవాసి Devotional విభాగంలో ప్రతి రోజు ఒక నామాన్ని మీకు* *అందజేస్తూ, మన గీతామాత కరుణకు అంజలి ఘటిస్తున్నాము.*

*🌸|| ఓం వ్యాసదేవాయ నమః ||🌸*

*పూజ్యశ్రీ భవఘ్నీ గురుదేవుల వారి అనుగ్రహం తో*

*🌹శ్రీమద్భగవద్గీత అష్టోత్తరశత నామావళి🌹*

15. *ఓం మంగళ స్వరూపిణ్యై నమః*

*అర్థం: మంగళము అంటే శుభం, క్షేమం. శ్రీమద్భగవద్గీత అంతటా శుభకరమైన విషయాలే ఉన్నాయి. అక్కడ కౌరవ పాండవ యుద్ధం కేవలం ఒక ప్రస్తావన మాత్రమే. సకల శ్రేయస్కరమైన గీతను పఠించిన ప్రతి వ్యక్తికి సుఖ శాంతులు లభిస్తున్నాయి. కనుక భగవద్గీత మంగళప్రదమైనది. నా జీవితం మంగళకరంగా సాగటానికీ, ఇక్కడ నేను సుఖశాంతులతో ఉండటానికీ గీత మార్గం చూపుతుంది.*

*మాత్రా స్పర్శాస్తు కౌంతేయ శీతోష్ణ సుఖదుఃఖదాః ।* *ఆగమాపాయినో-నిత్యాః తాంస్తితిక్షస్వ భారత ॥ 2.14*

*అర్థం: విషయ సంబంధాలు చలిని, వేడిని, సుఖదుఃఖాలను కలిగిస్తాయి. అవి అనిత్యాలు. వచ్చి పోయేవి. కావున వాటిని సహించాలని భగవానుని వచనం.*

*జితాత్మనః ప్రశాంతస్య పరమాత్మా సమాహితః ।*

*శీతోష్ణ సుఖదుఃఖేషు తథా మానావమానయోః ॥ 6.7*

*అర్థం: శీతోష్ణాలు, సుఖదుఃఖాలు, మానావమానాలు మొదలైన ద్వంద్వాలకు చలింపక వానియందు సమబుద్ధి గలిగిన వాడు, పరమ శాంతుడు, ఆత్మ విజయం గలవాడు పరమాత్మానుభవం పొందుతున్నాడు. పరమాత్మానుభవమే మంగళం. ప్రశాంత చిత్తుడు, పరమ శాంతుడు ఇహలోకంలో సుఖశాంతులు పొందటమే గాక, జన్మ దుఃఖాలనుండి విముక్తుడు అవుతాడని గీతా వాక్యం.*

*నేనెవరో నాకు తెలిపి, అన్ని వేళలా ఆత్మస్మరణలో ఉండటమే మంగళకరం అని ప్రబోధిస్తున్న గీతామాతకు నిండుమనస్సుతో నమస్కృతి సమర్పిస్తున్నాను.*    

    *🌷💠|| జై గురుదేవ్ ||💠🌷*

🌺🌺🌺 🙏🕉️🙏 🌺🌺🌺