(560) (03.03.2026)

అమ్మ అవుతున్నానని తెలిసి చేసుకోలేనని పుట్టింటికి పంపినారు

పెళ్ళై నప్పటి నుంచి 24 గంటలు నా గురించే ఆలోచిస్తున్నారు

ఎందుకండి నేనంటే మీకు అంత ఇష్టము 

ఈ రోజు వరకు నాకు రానివ్వకున్నారు ఎటువంటి కష్టము //

ఉదయానే లేవాల్సి వస్తుందని

ఇంటి పనిలో అలిసి పోతానని

ఇపుడు సుఖపడితే పురుటి తరువాత కష్టపడవచ్చని

అపుడు నిదుర లేని రాతిరులు గడపాల్సి వస్తుందని //

నా గురించి ఎంత చక్కగా ఆలోచించినారు

ప్రతి విషయంలోనూ ఎన్నో జాగ్రత్తలు తీసుకుంటున్నారు

ఇంతకు మించిన అదృష్టం ఏమున్నది

ఆ దేవుని ఇంతకన్నా కోరేది ఏమున్నది //

వేవిళ్ళ వేళ మామిళ్ళు తినాలనిపిస్తే

పుట్టినింటి వారు గుర్తుకు వస్తే

ప్రతి చిన్న కోరిక తీర్చినారు

నను కనుపాపలా చూచుకున్నారు //

ఏదో ఒక సమయంలో చరవాణిలో నను పలకరిస్తూనే ఉన్నారు

నా ఆరోగ్యం గురించి అడుగుతూనే ఉన్నారు

పెళ్ళికి ముందు నేను ఇంతలా ఊహించలేదు

ఇంత ప్రేమగా చూచుకునే భర్త దొరుకుతాడని కల గనలేదు //

నేను ఏనాడు నగ-నట్రా మీ నుంచి కోరుకోను

ఆస్తులు-అంతస్తులు కొనమని అడగను

నా ఊపిరి ఉన్నంత వరకు మీ ప్రేమనే కోరుకుంటాను

మీ హృదయంలో కొంత చోటు మాత్రం అడుగుతాను //

ఆ దేవుడు ప్రత్యక్షమై ఏదైనా వరం కోరుకోమంటే

మరుజన్మలో కూడా మిమ్మల్ని భర్తగా కోరుకుంటా

మీరు నా ఎదురుగా నిలబడి మనసులోని మాట చెప్పమంటే

మీ ఊపిరి ఉన్నంత వరకు మీ ప్రేమను నాకే పంచమంటా //

మధిర వెంకట రమణ, హైదరాబాద్