_(కవితా దినోత్సవం కోసం)_

*_ఏది కవిత.._*

నీలోని భావాన్ని

నీకు తోచిన రీతిలో

మంచిగా చెప్పగలిగితే..

*_అది కవితే..!_*

నీలోని వేదనను

అందరికీ అర్థమయ్యేలా

ఆర్ద్రంగా అక్షరీకరించగలిగితే..

*_అది కవితే..!_*

సమాజం పట్ల నీ ఆలోచనకు

నిక్కచ్చిగా అక్షరరూపం ఇవ్వగలిగితే..

*_అది కవితే..!_*

కళ్లెదుట జరుగుతున్న

అన్యాయాలను ఎత్తిచూపుతూ నిర్భయంగా

రుధిరాక్షరాలను పేర్చగలిగితే..

*_అది కవితే..!_*

కులాలు..మతాలు..

వాటి కారణంగా విబేధాలు..

మనుషుల మధ్య అంతరాలు..

ఇవి చూసి గుండె మండి

కలంతో అనలం సృష్టించగలిగితే..

*_అది కవితే..!_*

అంతేనా..

సమాజం..

ప్రకృతి.. ప్రాకృతి..ఆకృతి..

సమరం..సాగరం..నగరం..

శృంగారం..వెటకారం..

*_కాదేదీ కవితకు అనర్హం_*

అనుకున్నా..

అన్నిటినీ మించిన వస్తువు..

*_స్త్రీ.._*

ఆ స్త్రీకి దైవరూపమైన

*_అమ్మ..!_*

ఓ కవీ..

చివరగా విను ఈ మాట..

కాళిదాసు నుంచి

ప్రేమదాసు వరకు..

సముద్రాల నుంచి 

జంధ్యాల దాకా..

శ్రీరంగం నుంచి నీ వరకు

ఎవరు ఏం రాసినా అంతరంగమే..

కలమే ఆయుధమైతే

కాగితమే కార్యరంగం..

సమాసం..సంధి..

వ్యాకరణం..

వీటిని మించి

నీ అంతఃకరణం..

అదే కావాలి

*_ప్రతి కవికి వ్యాకరణం.._*

*_ప్రతి కవితకీ మూలకణం..!_*

✍🏽✍🏽✍🏽✍🏽✍🏽✍🏽✍🏽✍🏽

*_ఎలిశెట్టి సురేష్ కుమార్_*

        9948546286

        7995666286