ఓం నమో భగవతే శ్రీ రమణాయ

                   భక్తుడు :

 భగవాన్! లోకమంతా "ఈశ్వర లీల" అని, అంతా "బ్రహ్మమే" అని అంటారు కదా! అయితే ఈ "చెడుగుణాలు, చెడుఅలవాట్లు కూడా పోగోట్టుకోవాలి" అని అంటారు ఎందుకు ?

                    మహర్షి :

  ఎందుకా! చెప్తాను విను. శరీరం ఉంది కదా! దానికి ఎక్కడో ఒక వ్రణం (పుండు) పుడుతుంది అని అనుకో! అది శరీరంలో ఒక భాగమే కదా అని ఊరుకుంటే, బాధ కలిగిస్తుంది. సాధారణ చికిత్సకు పోలేదంటే వైద్యుడు వచ్చి, కత్తితో ఆ భాగం కోసి, చెడు రక్తం తీసివేసి మంచి రక్తం బయటకి పోకుండా రక్షణగా ఒక కట్టు కట్టడం లేదా? ఆ వ్రణం కోయకుండా వదిలితే, లోపలంతా కుళ్లుతుంది. కోసిన తరువాత కట్టు కట్టలేదంటే, చీము పడుతుంది. 

   అట్లాగే మానవుని విషయంలోనూ అంతే. చెడుగుణాలు, చెడుఅలవాట్లు మానవుల విషయంలో పుండు లాంటివి. కోసి వేయకుంటే క్రిందకు దిగజారిపోతారు. ఎలాంటి వ్యాధో, అలాంటి చికిత్స చేయాలి.