*_వేమన్న చెప్పింది_* 

*_వేదం రా..!!_*

+++++++++++++++++

వేమన జయంతి సందర్బంగా..

################

*_ఉప్పు కప్పురంబు_* 

*_ఒక్క పోలికనుండు.._*

*_చూడ చూడ_* 

*_రుచుల జాడ వేరు_*

కవులందు వేమన వేరయా

వినర తెలుగోడా..!

కవిత్రయమన్న 

తిక్కన,వేమన,గురజాడ

ఇది శ్రీశ్రీ మాట..!

వానలో తడవని..

వేమన శతకం వినని

మనిషి ఉండడనేది

నిస్సందేహం..

*అంతటి శక్తిమంతం*

*ఆయన కవితా ప్రవాహం..!*

మాసిన గడ్డం..

ఒంటిపై గోచీ..

వంచిన శిరస్సు...

అందులో ఎంత తేజస్సు..

తరిగిపోని యశస్సు..

ఇదీ నాలుగు మాటల్లో

వేమన..వివరంగా చెప్పాలంటే 

అంతే ఉండని

*మహాగ్రంధమని* 

*నా భావన..!*

*_భోగి కాని వాడు_* 

*_యోగి కాలేడన్న ఆర్యోక్తి.._*

వేమనకే  ఉపయుక్తి..

జీవితమంతా విలాసం..

వ్యసనాలతో ఉల్లాసం..

చెడు సావాసం..

ఒకనాటికి ముంచుకొచ్చిన

వైరాగ్యం..

పొర్లుకొచ్చిన కయితలు..

*సిసలైన జీవిత కతలు..!*

వేశ్యల చుట్టూ 

తిరిగిన వేమయ్య..

బంధాల దాస్య విముక్తి

పొందిన సిద్ధయ్య..

మూడు వాక్యాల్లో తత్వబోధన..

నాలుగో వాక్యంలో 

కృతజ్ఞతా భావన..!

*_విశ్వదాభిరామ_* 

*_వినుర వేమ.._*

నీ చుట్టూ ఉండే సీమ

మొత్తం భ్రమ!

నచ్చింది..మెచ్చింది

*_ఆటవెలది.._*

అందులోనే రాసేశాడు

తత్వాలు వందలకొలది..

ఔపోసన పట్టి పరసువేది

విరక్తి పుట్టి అయ్యాడు

సిసలైన తత్వవాది..

జమీందారో..రారాజో

ఆయన రచనలు

ఆశనిరాశల తరాజు..

వేదవేదాంగాల బేరీజు..!

వేమన వాదంలో 

ప్రధానంగా నిర్వేదం..

తిరుగుబాటు.. జరుగుబాటు...

జీవిత అర్థం..పరమార్థం..

*ప్రతీదీ యదార్థం..*

చక్కని ప్రతిపదార్థం..

ఒక్కోసారి అర్థం కాని

*_బ్రహ్మపదార్థం..!_*

ఏదేమైనా..భాష సరళం..

భావం నిండా 

ఆయన త్రాగిన గరళం..

చవిచూసిన గందరగోళం..

గుణపాఠం చెప్పిన సానిమేళం..

*_తన అనుభవాలే తత్వాలు_*

తలవంచిన సంకుచత్వాలు

మొత్తంగా వేమన తానయ్యాడు 

*తాత్వికుడు..బోధకుడు..*

అంతిమంగా దార్శనికుడు

*_అందుకే వేమన పలుకులు_*

*_ఎప్పటికీ ములుకులు..!_*

************************

   

*_ఎలిశెట్టి సురేష్ కుమార్_*

         9948546286

         7995666286