*మహాభారతంలో అత్యంత శక్తివంతమైన, కానీ చాలామందికి తెలియని అద్భుతమైన పాత్ర బర్బరీకుడు. ఈయన గురించిన పూర్తి వివరాలు, శివుడు మరియు కృష్ణుడు ఇచ్చిన వరాలు, మరియు కురుక్షేత్ర యుద్ధంలో ఆయన పాల్గొనకపోవడానికి గల కారణాలు ఇక్కడ చూద్దాం.*

*1. బర్బరీకుడు ఎవరు?*

*బర్బరీకుడు భీముడి మనవడు, ఘటోత్కచుడి కుమారుడు. ఈయనకు చిన్నతనం నుంచే యుద్ధ విద్యల పట్ల విపరీతమైన ఆసక్తి ఉండేది. తన తల్లి అయిన అహిలావతి దగ్గర రాజనీతిని, యుద్ధ విద్యలను నేర్చుకున్నాడు.*

*2. శివుని వల్ల ఏ వరం పొందాడు?*

*బర్బరీకుడు నవదుర్గలను, పరమశివుడిని మెప్పించి ఘోరమైన తపస్సు చేశాడు. శివుడు అతని తపస్సుకు మెచ్చి, అతనికి మూడు అమోఘమైన బాణాలను (తీన్ బాణ్) ప్రసాదించాడు.*

*మొదటి బాణం:* *శత్రువులందరిని, నాశనం చేయాల్సిన లక్ష్యాలను గురిచూపిస్తుంది (Mark చేస్తుంది).*

 *రెండవ బాణం:* 

*రక్షించాల్సిన వారిని, వదిలేయాల్సిన* *వస్తువులను గుర్తిస్తుంది.*

 *మూడవ బాణం:* 

*మొదటి బాణం గుర్తించిన శత్రువులందరినీ క్షణాల్లో సంహరించి తిరిగి బర్బరీకుడి అమ్ములపొదిలోకి చేరుకుంటుంది. ఈ మూడు బాణాల వల్ల బర్బరీకుడు కేవలం కొన్ని నిమిషాల్లోనే ఇరుపక్షాల సైన్యాన్ని ఒంటరిగా అంతమొందించగల శక్తిని పొందాడు.*

*3. కురుక్షేత్ర యుద్ధంలో ఎందుకు పాల్గొనలేకపోయాడు?*

*కురుక్షేత్ర యుద్ధం ప్రారంభమయ్యే ముందు, బర్బరీకుడు యుద్ధం చూడటానికి, వీలైతే పాల్గొనడానికి బయలుదేరాడు. బయలుదేరే ముందు తన తల్లికి ఒక మాట ఇచ్చాడు."యుద్ధంలో ఏ పక్షం అయితే బలహీనంగా ఉండి, ఓడిపోయే స్థితిలో ఉంటుందో... నేను ఆ పక్షాన నిలబడి పోరాడుతాను" అని శపథం చేశాడు. శ్రీకృష్ణుడికి ఈ విషయం తెలిసింది. బర్బరీకుడు కనుక యుద్ధంలో దిగితే మహాభారత యుద్ధం ఒక్క రోజులో ముగిసిపోతుంది. ఎందుకంటే, బర్బరీకుడు ఓడిపోయే పక్షాన (కౌరవుల వైపు) చేరి పాండవులను చంపేస్తాడు. అప్పుడు పాండవులు బలహీనపడతారు, కాబట్టి బర్బరీకుడు మళ్లీ పాండవుల వైపు మారి కౌరవులను చంపుతాడు. ఇలా ఇరువైపులా అందరూ చనిపోయి, చివరకు బర్బరీకుడు ఒక్కడే మిగులుతాడు. ధర్మ స్థాపన జరగదు.*

*కృష్ణుడి మాయ - త్యాగం:*

*శ్రీకృష్ణుడు ఒక బ్రాహ్మణుడి రూపంలో బర్బరీకుడిని కలిసి అతని శక్తిని పరీక్షించాడు. ఒకే బాణంతో ఒక రావిచెట్టు ఆకులన్నింటినీ రాల్చమని అడిగాడు. బర్బరీకుడు బాణం వేయగా, అది చెట్టు ఆకులన్నింటినీ గుర్తు పెడుతూ, కృష్ణుడు తన పాదం కింద దాచిన ఒక ఆకును కూడా గుర్తు పెట్టడానికి కృష్ణుడి పాదం చుట్టూ తిరిగింది. బర్బరీకుడి శక్తిని గ్రహించిన కృష్ణుడు, దానంగా అతని తల (శీర్షం) అడిగాడు. కృష్ణుడి మహిమను గ్రహించిన బర్బరీకుడు, వచ్చినవాడు సాక్షాత్తు పరమాత్ముడే అని తెలుసుకుని, సంతోషంగా తన తలను దానం చేయడానికి సిద్ధపడ్డాడు. కానీ, తనకు మహాభారత యుద్ధం మొత్తం చూడాలని ఉందని కోరాడు.*

*4. యుద్ధము తరువాత అతను ఏ తీర్పు ఇచ్చాడు?*

*కృష్ణుడు బర్బరీకుడి తలను ఒక ఎత్తైన కొండపై (లేదా స్తంభంపై) ఉంచాడు. అక్కడ నుండి బర్బరీకుడు యుద్ధం మొత్తాన్ని వీక్షించాడు. యుద్ధం ముగిసిన తర్వాత పాండవులలో "యుద్ధం గెలవడానికి నేనే కారణం అంటే నేనే కారణం" అని అహంకారం, వివాదం మొదలైంది. అప్పుడు కృష్ణుడు "ఈ యుద్ధాన్ని మొదటి నుండి చివరి వరకు తటస్థంగా చూసింది బర్బరీకుడు ఒక్కడే, కాబట్టి అతన్నే అడుగుదాం" అని అందరినీ బర్బరీకుడి దగ్గరకు తీసుకెళ్లాడు.*

*బర్బరీకుడి తీర్పు:*

*"నాకు యుద్ధరంగంలో ఏ ఒక్క వీరుడూ (అటు భీముడు గానీ, ఇటు అర్జునుడు గానీ) యుద్ధం చేస్తున్నట్టు కనిపించలేదు. నాకు కనిపించిందల్లా ఒక్కటే... శ్రీకృష్ణుని సుదర్శన చక్రం శత్రువుల తలలను నరుకుతుంటే, మహాకాళి ఆ రక్తాన్ని తాగుతూ కనిపించింది. ఈ యుద్ధం మొత్తం కృష్ణుడి వ్యూహం, మహిమ వల్లే సాగింది తప్ప మిగతా వారంతా కేవలం నిమిత్తమాత్రులు." ఈ తీర్పుతో పాండవుల అహంకారం అణిగిపోయింది.*

*5. కృష్ణుడు ఇచ్చిన వరం ఏమిటి?*

*బర్బరీకుడు చేసిన గొప్ప త్యాగానికి, భక్తికి మెచ్చిన శ్రీకృష్ణుడు అతనికి ఒక అద్భుతమైన వరం ఇచ్చాడు:*

*కృష్ణుడి వరం:* 

*"కలియుగంలో నువ్వు నా పేరుతో పూజలందుకుంటావు. నీ భక్తులు నిన్ను నా స్వరూపంగా భావిస్తారు. నీ దగ్గరకు వచ్చి మనస్ఫూర్తిగా మొరపెట్టుకునే భక్తుల కోరికలు వెంటనే నెరవేరుతాయి" అని వరమిచ్చాడు. ఈ వరం వల్లే ప్రస్తుతం బర్బరీకుడిని రాజస్థాన్‌లోని ఖాటు అనే ప్రదేశంలో "ఖాటు శ్యామ్ జీ" (Khatu Shyam) అనే పేరుతో శ్రీకృష్ణుడి రూపంలో ఎంతో వైభవంగా పూజిస్తారు. కలియుగంలో అత్యంత శక్తివంతమైన దేవుళ్లలో ఈయన ఒకరిగా భక్తుల నమ్మకం.*

*┈┉┅━❀꧁హరేకృష్ణ꧂❀━┅┉┈*

          *ఆధ్యాత్మిక అన్వేషకులు*

🍁📚🍁 🙏🕉️🙏 🍁📚🍁